KALIBO, Aklan—Sa gahum it executive order, nag-instrikto kontra sa African swine fever ukon ASF ro lokal nga gobyerno it Banga suno kay Mayor Noel “Boy” Redison.
Suno kana nga bangud nga maeapit eamang ro Barangay Arcanghel Sur, Balete kun sa siin nailista ro kauna-unahan nga kaso it ASF ag may mga access road pasueod sa Banga, rason nga nagtukod sanda it border control checkpoint sa barangay Sibalew ag national highway nga sakop it barangay Venturanza agud nga masiguro ro kaeowasan it lugar sa makamaeatay nga sakit it baboy kun sa siin maabu kara ro mga backyard hog raisers.
Mabahoe ro negatibong epekto it executive order bangud nga hugut nga ginabawae ro pagpasueod it mga buhi nga baboy, karne ag mga frozen pork products.
Apang ginpahayag ni Mayor Redison nga ro EO eamang ro pinaka epektibong pamaagi agud nga indi makasueod ro ASF sa andang banwa.
Maabu eon sigon sanda nga nakumpiska nga mga pork and products nga insigida man nanda nga ginsug-an.
Obligado man suno kana ro mga meat vendors ag mga nagakatay it baboy nga magpangayo anay it clearance halin sa Department of Agriculture ag natungdan nga mga punong barangay.
Sa pihak nga parte, naglibot sigon ro mga tawuhan it DA sa barangay Sibalew agud nga magbo-oe it blood samples it mga alagang baboy agud nga ma-test sa ASF.
Padayun man ro pagbawae sa pagpasueod ag pagpaguwa it mga baboy sa nasambit nga lugar.
Hinyu pa nana sa mga pumueuyu nga maging tampad ag insigidang i-report kanda kon may nakitang sintomas it ASF sa gina alagaan nga mga baboy.
