KALIBO, Aklan — Naging negatibo ro ginpatigayon nga pagkutkot it pamilya Flores sa ginaturo it albularyo nga gin-eubngan sa eawas it 15-anyos nga si Jhuros Flores, hapon it Domingo, Pebrero 16, mga 500 metros ro kaeayuon halin sa anang gin-eumsan kara sa Brgy. Polo, Banga.
Suno kay Gil Flores, lolo it binatilyo nga nagbakasakali man sanda bangud nga owa man suno kana it maduea kanda kon tumanon ro ginahambae it albularyo.
Dugang pa nga mismong imaw ro nagbo-oe it pala halin sa sangka barangay tanod nga nagsunod ag nagkutkot sa ginaturo nga lokasyon.
Apang owa sanda it nakita nga eawas ni Jhuros ag maskin ro mabaho nga hugum nga senyales nga may gin-eubong nga tawo sa nasambit nga lugar .
Owa man sigon sanda it nabatyagan nga kakaiba sa pag-agto sa lugar sa tabok it suba.
Maskin sigon sanda hay nagaduda man sa ginaturo it albularyo bangud nga masyado eon nga maeayo ro lugar sa gin-eumsan ni Jhuros ag masyadong magamo kun sa siin owa it nakita nga bakas nga may gin-eubong nga tawo idtu.
Samtang, ginkumpirma man ni Flores nga haeos nagdungan ro albularyo ag ro sambilog pang vlogger nga may daea nga ayam nga nag-agto sa andang baeay agud nga magbulig sa pag-usoy sa eawas it binatilyo apang owa sigon nanda ginpadungan ro daywa sa posibilidad nga makaangkon it owa pagka-ilintindihan.
Sa makaron hay nagapabilin nga bukas ro andang pamilya sa sin-o man nga gustong magbulig agud eamang nga makita maskin ro eawas eon lang it anang apo.
