KALIBO, Aklan — Kasong pag-eabag sa Section 5, 11 ag 12 it RA 9165 ukon Comprehensive Dangerous Drugs Act of 2002 ro ginpasaka kontra sa ginakabig nga bigtime dealer it marijuana sa probinsiya it Aklan ag Capiz.
Raya ro ginkumpirma ni Philippine Drug Enforcement Agency (PDEA)-Aklan Provincial Officer, Investigator Agent III Jyxyvzcky Escrupolo.
Presente raya nga nakakulong sa detention facility it PDEA Regional Office ag nagahueat eon lang sanda it mandu halin sa korte para sa pagsaylo kara sa jail facility it Aklan.
Nasayuran nga napasaalima it mga awtoridad ro dealer it marijuana sa ginpatigayon nga operasyon sa Sitio Airport, Barangay Caticlan, Malay, adlaw it Lunes, Marso 10, 2025.
Ginkilaea ni Investigator Agent III Escrupolo ro naaresto nga si Jainel Ian Tuazon, 26, ag residente it nasambit nga lugar ag kaibahan sa listahan it andang high value target.
Ginkasa ro buy-bust operation it gintingob nga pwersa it mga tawuhan it Malay Municipal Police Station kaibahan ro PDEA Provincial Office.
Nabakae halin sa suspek ro kapin sa sang kilo nga ginadudahan nga ginpamaea nga dahon it marijuana kabaylo it P23,000 nga buybust money kamana man ro dugang nga 18 packs it ginadudahan nga marijuana nga nakumpiska sa anang posisyon ag kontrol, mobile phone, kilohan ag food container nga ginasudlan it mga illegal nga droga nga may estimated market value tanan nga kapin sa P100,000.
Ko ulihing quarter it 2024 hay na-monitor eon sigon nanda ro suspek sa social media, apang naging mabudlay ro andang pagbantay bangud nga nagagamit raya it nagkaeain-eain nga online accounts.
Ginasugid nga ro anang supply hay nagahalin pa sa Kalinga, Apayao nga padayun pa nanda nga ginaberipika.
Samtang, gin engganyo man nana ro publiko nga padayun nga suportahan ro kampanya it mga awtoridad kontra sa mga ilegal nga aktibidad.
