KALIBO, Aklan — Mas pa nga ginpabaskog it kapulisan ro manhunt operation kontra sa suspek sa brutal nga pagpatay sa 89 anyos nga mamamahayag nga si Juan “Johnny” Dayang matapos positibong matumod ro anang pagkatawo.
Kasunod kara, nagtanyag it ₱500,000 nga padya ro gobyerno probinsiyal it Aklan ag lokal nga gobyerno it Kalibo sa sin-o man nga makaturo sa ginakahimtangan it suspek.
Nauna eon nga ginpahayag ni PNP Chief Gen. Rommel Francisco Marbil nga haum eon nga magpasaka it kaso ro mga awtoridad kontra sa suspek, nga hasta sa makaron hay padayun nga ginatugis.
Madumduman nga adlaw it Huwebes sa sangka press conference hay ginkilaea ro suspek nga si Kim Wency Antonio it Balugo Valencia, Negros Oriental.
Ginasugid nga nagrenta ro suspek it boarding house, hotel ag motorsiklo.
Na-trace it kapulisan ro anang hueag pinaagi sa backtracking sa mga CCTV, ag natukiban nga may kasong droga imaw ko 2021 sa Pasig City.
Suno kay Brig. Gen. Jack Wanky, regional director it Police Regional Office 6, gin-umpisahan ni Antonio ro pag surveillance sa Kalibo umpisa Abril 3 ag gumamit it tatlong magkaibang motorsiklo.
Nagguwa sigon imaw it Western Visayas ko Mayo 2.
Sa makaron hay nakikipag-angot eon ro mga awtoridad sa Metro Manila agud nga mausoy ro suspek.
Si Dayang hay nabaril samtang nagatan-aw it telebisyon sa sueod it anang baeay sa Villa Salvacion, Brgy. Andagao, Kalibo ko gabi-i it Abril 29.
