KALIBO, Aklan — Nagapameligro nga indi ma-isyuhan it drivers license ro sangka vlogger sa Aklan bangud sa anang viral video nga nagapatigayon it peligrosong pagmaneho sa national highway nga sakop it probinsiya.
Raya hay matapos nga ginpatawag imaw it hepe it LTO-Aklan nga si Engr. Marlon Velez sa anang taeatapan.
Nasayuran nga sangka show-cause order ro ginpaguwa ko Martes, Mayo 13, 2025 it Regional Office 6 it Land Transportation Office nga nagpaguwa it mandu agud nga ipatawag ro vlogger nga si Boy Kayak kasunod it nag-viral nana nga video sa social media, kun sa siin nagapatigayon it pilang stunts partikular ro paghapa sa motorsiklo nga matsa naka-superman position ag nakasuksok eamang it underwear ag sando.
Makabig sigon raya nga reckless driving nga nagatuga kana it peligro ag sa iba pang mga motorista sa lugar.
Natukiban pa it LTO nga nagamaneho ro vlogger nga owa it lisensiya rason nga dugang pa gid raya nga bayolasyon sa idaeum it RA 4136 ukon reckless driving.
Ro show-cause order hay nagamandu sa vlogger nga magtau it eksplinasyon agud nga depensahan ro anang ginhimo nga aksyon sa sueod it limang adlaw matapos nga raya hay mabaton at ipaathag kon ham-an nga indi imaw dapat nga ma-disqualify nga makabo-oe ag mag-angkon it lisensiya.
Dugang pa ni Engr. Velez nga bilang sangka fish vendor hay importante ro pag-angkon nana it lisensiya sa pagmaneho it anang topdown tricycle sa paglibod it isda.
Posibleng maapektuhan sigon ro anang pangabuhian sa oras nga indi pagpasugtan it LTO Central Office ag LTO Region 6 nga ma-isyuhan imaw it lisensiya.
Ro insidente hay padayun pa nga gina-usisa ag gina-tun-an it nasambit nga mga taeatapan.
Laygay pa ni Engr. Velez nga bilang sangka vlogger hay dapat nga magaserbi imaw nga modelo sa maabu nana nga mga followers ag bukon it puro kabulastugan ro content it anang vlog.
