KALIBO, Aklan—Ginpakigbahin nanday Aklan 1st ag 2nd district congressmen elect Jesus “Jess” Marquez ag Florencio “Joeben” Miraflores ro andang eubus nga pagpasaeamat bangud sa pagsalig nga gintau kanda it mga pumueuyu.
Sa interview it Bombo Radyo, ginpahayag ni congressman elect Miraflores nga batyag gihapon nana ro pagpalangga kana it mga Akeanon bangud nga maskin nga nauna eon nga nag-anunsyo it anang pagretiro hay uman imaw nga ginbaton sa anang pagbalik sa politika agud nga maging representante it ikaywang distrito it Aklan sa kongreso.
Angot kara, nagpahayag imaw it pagpasaeamat sa anang mga tagasuporta, sa anang pamilya ag eabaw sa tanan sa Diyos nga naggiya kana ag sa andang grupo umpisa sa kampanya hasta ko adlaw it eleksyon.
Pila sa anang mga plano hay mas pa nga mapaayos ro medical services sa anang distrito pinaagi sa pagtau it prayoridad nga maging level 1 hospital ro Ibajay district hospital ag magpatindog it district hospital sa Cubay Sur, Malay agud nga malikawan ro pagginutok sa Aklan provincial hospital.
Pagataw-an man nana it atensyon ro pag-ayos sa mga pasilidad sa isla it boracay eabi eon ro pagbutang it cruise port terminal sa Brgy. Caticlan, cityhood it Malay ag re-classification it Boracay agud nga mataw-an it seguridad ro mga tumandok it isla.
Ginpasiguro man nana ro padayun nga ayuda sa mga deserving nga mga indigents sa anang distrito pinaagi sa scholarship program, AICS, AKAP, TUPAD ag iba pa.
Samtang, ginpasiguro man ni 1st district congressman elect Jess Marquez nga pagapadayunon ro mga programa ag proyekto nga gin-umpisahan it anang ama nga si congressman Carlito Marquez nga nakataeanang magatapos ro anang ikatlong termino.
Partikular ro mga bills nga owa pa naka-abot sa senado kun sa siin sambilog kara hay ro anang gin-author nga modernization of Phivolcs nga pirmado eon ni President Ferdinand Marcos Jr. ko buean it Abril.
Si Jess Marquez hay nagserbi bilang chief of staff it anang ama umpisa sa pagiging gobernador hasta nga raya hay naging congressman.
Madumduman nga ro daywang representante it Aklan hay naiproklama eon kahapon nga adlaw it Martes.
