Uwa it easy money nga ginatawag kundi ginapangabudlayan raya it husto bago maangkon.
Raya ro naging padumdom ni P/Lt. Sally Bretania, deputy chief of police ag tagapaghambae man it Kalibo Municipal Police Station matapos nga nagdangop sa andang taeatapan ro nagaabot sa 40 nga biktima it ginakabig nga “Benta Slot” scam nga natabo sa banwa it Kalibo.
Suno kana, sa nasambit nga numero hay daywa eamang ro taga-Kalibo rason nga raya eamang ro nakapabaehag sa andang taeatapan agud nga makapasaka it kaso kontra sa ginareklamong babaye nga ginatumod kay Joy Parcon Ortega Zambrona nga naga-istar suno kanda sa Brgy. Andagao, Kalibo.
Ginpahayag dugang ni P/Lt. Bretania nga ko una hay nakapag-pay-out pa sigon ro mga biktima hasta nga nayanggaw ro mga raya ag inabot it masobra sang buean hay inde eon nanda makontak ro nasambit nga babaye.
May nagakalhit nga litrato makaron sa social media nga ginatumod nanda nga si Joy apang suno kay P/Lt. Bretania hay padayon pa nanda nga ginakumpirma kon raya gidman ro identity it ginareklamo it mga biktima.
Suno sa mga tagreklamo, nagaabot eon sa daywang dag-on nga naga-eksister ro benta slot rason nga panawagan it mga raya sa andang ka-transaksyon nga babaye nga magpakita ag atubadngon ro reklamo kontra kana.
