Nagtambong sa Department of Justice (DOJ) si dating Bamban, Tarlac Mayor Alice Guo para sa anang preliminary investigation angot it tatlong bag-ong reklamong ginpasaka kontra kana it National Bureau of Investigation (NBI) pilang buean eon ro nagtaliwan.
Suno kay Atty. Nicole Jamilla, abogado ni Guo, ro pag-atubang it dating alkalde hay para magsumite it counter-affidavits para depensahan ro sarili kontra sa mga alegasyon it graft, tax evasion, ag falsification of public documents. Tatlong kontra-salaysay ro gindihon bilang sabat sa mga reklamo.
Dugang pa ni Jamilla, bukon it bag-o ro reklamo it falsification of public documents, ag nauna eon nga may gindihong kaso nga may parehong isyu.
Nagpanindugan ro abogado nga Filipino citizen si Guo sa pihak it mga kontrobersiyang nagasakop sa anang pagkatawo.
Padayon nga ginpamilit it kampo ni Guo ro andang pagtiwala sa proseso it hustisya para limpyuhon ro anang pangaean halin sa mga pasibangud.
