KALIBO, Aklan — Sa kabilugan nga 22 nga mga local candidates nga nagpadaeagan ko 2025 Midtern Elections sa banwa it Kalibo, sambilog pa eamang ro nagsumite it anang Statements of Contributions and Expenditures (SOCE).
Padumdum ni Atty. Christian Itulid, election officer IV it Commission on Elections (Comelec)-Kalibo nga mandato sa laye ro pag-file it SOCE it tanan nga mga kandidato 30 diyas matapos ro eleksyon ag owa raya it extension ukon hasta eon lang sa Hunyo 11.
Nagpaandam pa imaw nga may paga-atubangon nga penalidad ro sin-o man nga kandidato nga mapas-eawan nga makasumite kara.
Ginhalimbawa nana ro mga nagdaog nga kandidato nga indi makasumite nga posibleng indi makapag-oath of office ukon indi makapungko sa anang pwesto.
Ro mga indi makadihon it SOCE sa unang kahigayunan hay pagapamultahon samtang ro indi makapagsumite sa ikaywang kahigayunan hay posibleng papanaugan it perpetual disqualification.
Indi man sigon pwedeng mag-file it SOCE pinaagi sa registered mail.
Raya hay bangud nga kinahangean nga mausisa kon orihinal ro pirma, mga resibo, ag iba pang-attachments sa SOCE.
Laygay pa ni Atty Itulid nga i-double check ro andang mga ginasumite nga SOCE kon saea ukon sobra ro gindeklara nga gastos bangud sa posibilidad nga magapangatubang it election offense nga overspending.
Sa pihak nga parte, gindugang pa ni Atty Itulid nga uman nga magabukas ro voter registration period sa Hulyo 1 hasta 11, 2025, para sa nakataeana nga 2025 barangay and Sangguniang Kabataan (SK) elections sa December 1.
Dugang pa nga indi eon nanda pagbatunon bilang proof of residency ro barangay clearance bangud sa pag-abuso kara.
