KALIBO, Aklan — Nalipay ro Department of Education (DepEd) Region 6 matapos nga umabot sa kabilugan nga 1,014,605 as of June 20 ro mga learners nga nagpa-enroll para sa school year 2024-2025 sa bilog nga Western Visayas.
Naghalin raya sa tanan nga public ag private schools kamana man sa mga local and state universities and colleges ukon LUCs and SUCs.
Raya ro ginpahayag ni Hernani Escullar Jr., tagapaghambae it DepEd Region 6.
Suno kana sa nasambit nga numero, 134,910 ro naghalin sa Aklan.
Angot kara, ginklaru ni Escullar nga ginaeauman nga magataas pa ro nasambit nga numero it mga nagpa-enroll bangud nga padayun pa nga nagabaton it mga late enrolles ro mga public schools.
Samtang owa pa suno kana naga-anunsyo ro DepEd angot sa pinal nga petsa para sa late enrollment, padayun nga magabaton it bag-ong estudyante ro mga eskwelahan.
Apang kinahangean eamang nga masiguro nga ro mga late enrollees hay maka-eagas sa anang mga kaklase pinaagi sa iga-provide nga mga activities ag learning materials.
Sa pihak nga parte, ginpahayag pa ni Escullar nga base sa assessment it DepEd sa unang domingo it pagbukas it klase, makabig raya nga maayos, kun sa siin, owa it nailistang anuman nga major untoward incident sa masobra sa 2,836 nga mga public schools sa Region 6.
Pagatutukan sigon it DepEd makaron ro literacy ag numeracy para mabuligan ro mga inunga nga mahina sa pagbasa ag paghuyap.
