KALIBO, Aklan — Nakataeanang igapaguwa it taeatapan ni Aklan 1st District Congressman Jess Marquez ro listahan it panibag-ong pangaean nga naeakip sa anang scholarship program nga “Papa Skwela” nga makabaton it education assistance.
Suno kana nga ginpaidaeum sa maid-id nga verification ag validation it Department of Social Welfare and Developmemt (DSWD) ro mga ginsumite nga pangaean it mga aplikante nga naga-abot sa kapin sa 3,600 halin sa nagkaeain-eain nga banwa sa unang distrito it probinsiya.
Sa pihak nga parte, gin anunsyo man ni Cong. Marquez nga sa maabot nga Nobyembre 5 hay pagahiwaton ro pay-out ukon pagpanupod it education assistance sa mga banwa it Banga, Libacao ag Madalag sa Teodosio’s Park sa banwa it Banga samtang sa Nobyembre 6 ro Balete, Altavas ag Batan nga pagapatigayunon sa Balete Civic Center.
Ro masunod nga pay-out it mga scholars halin sa banwa it Kalibo ag New Washington hay pagahiwaton sa Nobyembre 7 sa Bliss Site Kalibo.
Ro scholarship program hay sa idaeum it AKAP ukon Ayuda sa Kapos ang Kita Program.
Ro mga requirements kara hay dapat nga natawo sa katung-anan it 2008 ag 2010 ro estudyante ag may ginikanan nga bukon it bastante ro ginakita.
Ginpaathag it kongresista nga ro estudyante ro maga apply ag ro ginikanan ro recipient.
Ro programa hay para sigon sa mga mahugod ag angay ag bagay nga mga estudyante nga nagatuyo nga masuportahan ro andang mga handum sa kabuhi, kun sa siin indi eon malisdan sa andang pagtuon ag mapahagan-hagan ro gaeastuson sa edukasyon.
Sa pihak nga parte, sambilog pang programa ro andang igapakilaea nga magatau man it ayuda sa mga senior citizens ag mga PWD’s nga may titulo nga “ Papa-alaga.”
Maghueat eamang sigon it dugang nga anunsyo kon hin-uno magapaguwa it application form.
