KALIBO, Aklan—Syento porsyento eon nga naabot it Department of Education ukon DepEd Aklan ro numero it mga estudyante nga nagpa-enroll para sa school year 2026-2027 sa ginpatigayon nga early registration nga nag-umpisa ko Enero 31 ag magabuhay it hasta sa Pebrero 26, 2026.
Suno kay Mar Bien Gregory Parel, tagapaghambae it DepEd Aklan, tuyo kara nga malikawan ro pagdueotdutan sa eskwelahan sa oras nga magbukas ro school year, maasikaso eagi it mga manugturo ro estudyante nga matugpa kanda, mabuligan ro mga eskwelahan sa mas maayos nga pagpahaom it kwarta, ag iba pang learning resources bago mag-umpisa ro klase.
Dugang pa ni Parel nga sakop sa early registration ro mga learners nga pasueod pa eamang sa Kindergarten, Grades 1, 7, ag 11, pati eon man ro mga unang beses nga maga-enroll sa public schools ag Alternative Learning System (ALS).
Ro early registration suno kana hay libre ag uwa it dapat bayaran ro mga ginikanan kundi mag-fill out eamang it Basic Education Pre-registration Form, ag magsumite it birth certificate.
Nasayuran nga sandig sa DepEd Order No. 017, series of 2025, mandatory ro early registration para sa mga bag-ong magasueod nga estudyante nga transferees.
