Nagpahayag it grabeng pagkadismaya ro mga residente it Pag-asa Island sa pahayag nga medyu ginatau eon lang sa China ro Kalayaan Island Group.
Para kanda, klaru nga teritoryo it Pilipinas ro mga isla ag mabuhay eon nanda nga gina-istaran ro lugar bilang pamatuod it soberanya.
Hugut nanda nga gina-insister nga indi dapat isurender ro kinamatarung it nasyon sa West Philippine Sea.
Suno man kay Mayor Billy Alindogan, mabuhay eon nga nagagana ro gobyerno sa andang lugar.
Nagaguwa man sa record nga 1980 pa nakaangkon it mga lokal nga opisyal sa lugar nga gin-ilihir it mga residente sa isla.
Sa pihak nga parte, ginklaru ni Senador Rodante Marcoleta nga saea ro interpretasyon sa anang ginhambae sa sangka pagpamati.
Suno kana nga bukon nana it intensyon nga ipanau ro Pag-asa Island ukon ro Kalayaan Island Group.
Ginpaathag nana nga ro statement hay kaparte it pangutana angot sa estratehiya it nasyon sa pagtindog kontra sa China.
Ginpasiguro man it Malacañang nga maskin hin-uno hay indi igasurender it gobyerno ro maskin sangka pulgada it teritoryo it Pilipinas. Nagpanindigan man ro Department of Foreign Affairs nga sakop it soberanya it nasyon ro Pag-asa Island ag Kalayaan Island Group.
Samtang, nagpabati-bati man ro sambilog sa mga kilaeang nagasueong it atong kinamatarung sa West Philippine Sea nga si Prof. Jay Batongbacal, matapos ro pilang isyu angot sa nasambit nga teritoryo.
Maskin nga owa kara direktang gintumod ro ginapabati-batian, maabu ro nagapati nga may kahilabtanan gihapon raya sa debate angot sa pagdumaea ag pag-angkon sa West Philippine Sea.
