Hantup sa tagipusuon nga nagpangayo it pasaylo si Department of the Interior and Local Government (DILG) Secretary Juanito Victor “Jonvic” Remulla sa publiko partikular eon sa sambilog sa mga naaresto nga nagahalo eamang it semento sa parte it Mandaluyong City.
Aminado ro sekretaryo nga owa imaw nakatau it klaru nga mga direktiba kun paalin nga ipatuman ro inisyatibo ag ro mga ordinansa sa idaeum it Safer Cities Initiative nga ro katuyuan hay maging hilway ro mga karsadahon halin sa mga krimen.
Suno kana nga nakataeanang magpueong ag makipagtalakayan ro andang opisina kabulig ro iba pang mga law enforcement agencies ag maging ro lokal nga gobyerno para maging maayos ro mga konsiderasyon nga kinahangeanon sa pagpatuman it mga polisiya sa idaeum kara.
Ginpasiguro it sekretaryo sa publiko nga bangud sa nag-umpisa eon ro pagpatuman kara, raya hay magapadayun sa nagkaeain-eain nga pamaagi para mapabilin ro kaayusan sa mga komunidad.
Sa pihak kara, ginpasiguro man ni Remulla nga pagatun-an nanda it mayad ro mga pagbag-o ag konsiderasyon agud nga masiguro nga indi mauman ro mga makarondaya nga klase it insidente.
Gindugang pa ni Remulla nga tuyo nanda nga mapabilin ro maayos nga mga karsadahon ag mga komunidad nga ginaeauman it publiko apang ginpamilit nga indi raya magiging perpekto eabi eon ag raya hay sangka tikang agud nga amat-amat nga matapna ro krimen sa mga karsada.
