Indi magaoy nga palanggaon, pili-on ag ipakigsukoe ro Pilipinas.
Raya ro panawagan ni Pangueong Ferdinand Marcos Jr., sa mga filipino matapos pangunahan ro pagdumdum sa ika-128 anibersaryo it Proklamasyon it Kahilwayan it Pilipnas ag Parada it Kahilwayan 2026 sa Rizal Park, sa Manila, adlaw it Biyernes, Hunyo 12.
Sa naging diskurso it Pangueo, gina-engganyo nana ro kada Filipino nga padaeman pa ro kasayuran ag maging mapag-usisa sa kamatuoran.
Kun magapabilin sigon nga tampad ro kada Filipino sa nasambit nga mga katuyuan hay makasigurado ro tanan nga maga-mana ro mga masunod nga henerasyon it sangka nasyon nga mas matibay, mas makatarungan, ag mas maumwad.
Kabay suno kana nga magaserbing bugkos ro bandera, ro Pambansang Awit, ag ro atong pagka-Pilipino sa pagbilog it sangka Bag-ong Pilipinas.
Sa sueod suno kana it masobra sa 300 anyos hay naging kolonya ro nasyon. Sa idaeum it pagdumea it dumueuong, naeksperyensihan it mga ninuno ro kapigaduhon, kawad-an it hustisya, ag pagpang-api.
Bangud kara, gina engganyo it Pangueo ro kada pumueuyung Filipino nga gamiton ro nasambit nga mga leksyon agud nga mapa-umwad ro nasyon ag mapaeawig ro kasarinlan.
Gin-aku it Pangueo nga maabu nga hangkat sa kahilwayan ag kaumwaran it nasyon ag kada Filipino partikular ro anomaliya, pagkanya-kanya, ag kapigaduhon kamana man ro pangkalibutanon nga mga hitabu ag paeag sa climate change ag kalikasan. Apang sa pihak kara, nagapabilin sigon ro anang pagpati ag pageaum sa kamayad , kahugod ag kamaeayran it lahing Pilipino.
