TANGALAN, Aklan —Umpisa makaron nga dag-on 2026 hay pagataw-an it insentibo it lokal nga gobyerno it Tangalan ro sin-o man nga mga estudyanye nga tumandok it banwa nga makaangkon it Latin honors ag maeakip sa mga topnotcher sa anuman nga Professional Regulation Commission (PRC) examinations.
Raya ro ginkumpirma ni Tangalan Mayor Gene Fuentes sa interview it Bombo Radyo Kalibo.
Raya hay base suno kana sa Municipal Ordinance nga ginpasa it Sangguniang Bayan ko ulihing quarter it 2025 ag ko Enero it makaron nga dag-on ro implementasyon.
Ro programa hay sa idaeum it Government Tertiary Financial Assistance ukon Scholarship Program it munisipyo nga nagatau it P4,000 kada semester sa mga deserving nga mga estudyante.
Makabaton suno kana it P10,000 nga cash ag plaque of appreciation ro Cum laude; P15,000 ag plake ro Magna Cum laude ag P20,000 ro Summa Cum Laude ag plake.
Mag-eowas kara, sa oras nga maging topnotcher sa anuman nga board exam nga pagaboe-on hay may nagahueat kanda nga dugang nga P30,000.
Pinaagi kara, nagaeaum si Mayor Fuentes nga mas maabu pa nga mga taga Tangalan ro magiging awardees bangud sa inspirasyong daea it incentives program it lokal nga gobyerno.
Dugang pa nga tuyo man kara nga maka engganyo it mga pamatan-on nga mas pa nga tutukan ro andang edukasyon bilang importante parte it andang kabuhi.
Samtang, makabo-oe eamang it cash incentive ro mga Latin honor awardee ag topnotcher sa oras nga makasumite it proof of award halin sa andang eskwelahan, valid ID nga may address nga banwa it Tangalan ag iba pang dokumento.
Ro deadline kara hay sa Hulyo 10 agud nga makahingabot sa pagahiwaton nga awarding ceremony sa Hulyo 31 kadungan sa kaadlawan it Tangalan ukon ro andang pormal nga pagseparar sa banwa it Makato.
Sa pihak nga parte, gin engganyo man nana ro mga estudyante nga gustong maeakip sa andang scholarship program kun sa siin pila sa mga requiremnts hay dapat nga ro income it ginikanan hay below poverty threshold ag nakapasa sa eksaminasyon nga ginatau it LGU Tangalan ag owa it scholarship grant sa iba pa nga mga institusyon.
