Sangka bag-ong world record ro nailista para sa pinakamadasig nga saeakyan nga himo sa LEGO matapos mag-abot sa kadasig nga 111 km/h (69 mph) ro sangka matuod nga replika it Koenigsegg Sadair’s Spear. Ro nasambit nga saeakyan hay madahan nga ginbilog gamit ro 327,906 nga piraso it LEGO Technic, ag madinaeag-on kara nga naeampasan it sobra sa doble ro nagtaliwan nga record nga 50 km/h.
Bilang kaparte it selebrasyon sa pagguwa it andang bag-ong LEGO set, mismong ro best driver it Koenigsegg nga si Markus Lundh ro nagmaneho it saeakyan sa sikat nga Goodwood hillclimb circuit. Suno kay Lubor Zelinka, ro design lead it LEGO, nag-abot sa 9,400 hours ukon masobra sa 12 months agud nga mabilog ro ginakabig nga pinaka-kumplikadong proyekto nanda. Kaibahan man kara ro sikat nga “Ghost Mode” it Koenigsegg, rason nga maging kauna-unahang full-size nga LEGO build nga may mga nakabukas nga body panels.
Nagatimbang ro bilog nga saeakyan it kapin sa 1,800 kilo, kun sa siin 400 kilo kara hay puro mga plastik nga LEGO. Maskin nga himo sa hampangan ro pangguwa nga itsura, matibay ro pundasyon kara sa idaeum nga ginaeakipan it sangka espoke metal chassis, IA-spec roll cage, mga matuod nga Koenigsegg carbon wheels, ag maayos nga suspension system.
Bukon it kapareho sa orihinal nga Sadair’s Spear nga may mabaskog nga makina, ro makasaysayang bersiyon ngara it LEGO hay ginapadaeagan eamang it sangka maisot nga electric motor nga napamatud-an nga bastante ro kabaskog agud nga maabot ro bag-ong speed record.
