Ginpakigbahin sa social media it actor nga si Rommel Padilla ro sangka post nga nagapuna kay Angel Locsin kasunod it open letter it aktres para sa anang igmanghud nga si Senador Robin Padilla.
Sa nasambit nga sueat, ginakwestiyon ni Angel ro paghipos sigon ni Robin kat imaw hay gina-angot sa red-tagging. Ginpahayag man it aktres ro anang pagkadismaya sa naging panindugan it senador sa pilang isyung pampulitika, kaibahan ro isyu sa China ag kay Kingdom of Jesus Christ founder Apollo Quiboloy. Gintapos nana ro sueat sa panawagang, “Tama na, Kuya. Gising na. Hindi pa huli ang lahat.”
Matapos raya, gin-post ni Rommel sa anang Facebook account ro sangka post it netizen nga nagabatikos kay Angel ag gibutangan raya it caption nga “#RealTalk.”
Gin-kuwestiyon sa nasambit nga post kun ham-an si Robin eamang ro ginapuna ni Angel ag owa sigon imaw naghambae sa iba pang isyung ginapangatubang it nasyon kapareho it pagbaha, kriminalidad, ag kontrobersiya sa flood control projects.
Nag-post man si Rommel it iba pang mensahe nga nagadepensa sa mga panindugang pampulitika it anang igmanghud kaibahan ro pahayag nga indi dapat eagi kabigon nga bukon it makabayan ro mga posisyon ni Robin ag posibleng isueong ro nasyonalismo ag kinamatarung nga pang-sosyudad nga owa ginasuportahan ro armadong pakikibaka.
Sa makaron, owa pa it direktang sabat si Senador Robin Padilla sa open letter ni Angel Locsin, kamana man nga owa pa nagtau it pahayag ro aktres angot sa mga post nga ginpakigbahin ni Rommel Padilla.
