Gina-istoryahan makaron sa social media ro TV host nga si Mariel Padilla matapos mataeupangdan it pilang netizens nga medyu owa eon nana gina-follow sa Instagram ro mga aktres nga sanday Angel Locsin ag Anne Curtis.
Suno sa mga netizen, naduea sigon sa listahan it mga gina-follow ni Mariel ro daywa matapos maging viral ro mensahe ni Angel para sa mister kara nga si Senator Robin Padilla.
Kung maga-agto sa social media ni Mariel indi eon makita sanday Angel ag Anne sa following list it Instagram account it TV host.
Samtang sa Instagram accounts nanday Angel ag Anne, naka-follow gihapon ro daywa kay Mariel hasta ko alas-11:49 it gabi-i, Hulyo 17.
Sa isyu man kon ham-an nga nadaeahig si Anne, pagduda it mga netizen nga raya hay bangud sa pagpakita it suporta it pilang celebrities kay Angel kun sa siin nagkomento si Anne Curtis sa post it aktres nga may caption nga ”Welcome back Mars, ay Darna pala.”
Madumduman nga naging sueod it balita si Angel matapos magpaguwa it mahabang pahayag angot sa anang pagkadismaya sa pilang panindugan ni Robin Padilla, kaibahan ro mga isyu sa red-tagging, suporta kay Kingdom of Jesus Christ founder Pastor Apollo Quiboloy, ag mga pahayag angot sa China ag West Philippine Sea.
Samtang, medyu nakisawsaw man ro igmanghud it senador nga si Rommel Padilla matapos ginpakigbahin sa social media ro post it sangka netizen nga nagabatikos kay Angel.
Sa makaron, owa pa it opisyal nga pahayag sanday Mariel Padilla, Angel Locsin, ag Anne Curtis angot sa isyu it gina alegar nga pag-unfollow sa Instagram.
