Nagapati si Vice President Sara Duterte nga ro State of the Nation Address (SONA) ni Pangueong Ferdinand “Bongbong” Marcos Jr. hay sangka “waste of time” ukon pag-uyan eamang it oras para sa mga Pilipino.
Ginhimo it bise presidente ro pahayag sa sangka panayam sa The Hague, Netherlands.
Uwa man sigon imaw nagpamantaw it SONA it Pangueo kapareho ku nagtaliwan nga dag-on ag uwa imaw it planong basahon ro sueod it SONA ukon maskin ro summary eamang bangud nagapati imaw nga pag-uyang eamang raya it oras.
Ginsambit man nana ro mga uwa natuman nga promisa it administrasyon, kapareho it pagpanaba sa ₱20 kada kilo it bugas.
Ginkwestyon man nana ro mga naging pahayag nga may makulong antes mag-Paskwa, partikular ro mga miyembro it Kamara, nga uwa man sigon natabo.
Ginpahayag man nana nga may mga personal sandang kasugtanan ni Marcos antes sanda magdaeagan nga magka-tandem nga uwa man sigon gintuman it Pangueo.
Raya eon ro pangatlong sunod nga dag-on nga uwa nagtambong ag uwa ginpamantaw it Bise Presidente ro SONA ni PBBM.
