KALIBO, Aklan — Nadugangan pa ro numero it mga hotels ag resorts nga ginpasugtan it Boracay inter-agency task force nga makapag-operate sa isla it Boracay.
Base sa ginpaguwang listahan it Department of Tourism (DOT) nga may petsang December 4, 2018, halin sa 243 hay nagaabot eon makaron sa 268 nga establisimento nga may kabilugang 9,637 rooms ro pwedeng magbaton it bookings ag reservations.
Nauna eon kara nga nagpaandam ro DOT nga mahimong makasuhan ro mga establisimentong uwa pa nakasunod sa requirements it Department of Environment and Natural Resources (DENR) ag Department of Interior and Local Government (DILG) apang nagabaton eon it mga booking reservations ag nagabutang it mga online promotions.
Madumduman man nga nagpaeag ro Department of Tourism (Dot) sa mga pasaway nga establisyemento sa Isla it Boracay nga uman raya nga ipasarado sa oras nga indi magsunod sa mga rules and regulations nga ginapatuman it ahensya.
Padayon ro padumdom it DOT sa publiko nga ro mga compliant nga hotels ag resorts eamang ro pasugtang makabaton it booking reservations halin ko Boracay reopening ko Oktubre 26.
Ro mga turistang magasueod sa Boracay hay kinahang-ean nga may booking reservation agud nga makasueod sa isla.
