KALIBO, Aklan – Pabor ro Alliance for Concerned Teachers representative France Castro sa pagpanog ni Vice President Sara Duterte bilang sekretarya it Department of Education.
Sa kamatuoran sigon maabo eun man ro andang mga puna nga imaw ro na’appoint sa umpisa pa eamang bangud nga uwa raya it eksperyensya sa nasambitan nga taeatapan o patag.
Sa panahon man ni Duterte ro kauna-unahang nagpangayo it confidential fund ro ahensiya nga uwa man it kaangtanan sa intelligence activity ngani nga raya hay uyang sigon it kwarta.
Ginamit eang sigon raya sa red-tagging ag profiling it mga manugturo ag progresibong organisasyon nga vocal sa mga polisiya it gobyerno.
Paathag ni Castro nga gina’ekspektar nanda nga magabueag ro UniTeam bangud dati pa eamang nga raya hay uwa it solido nga ginabuylugan nga isyu ukon plataporma.
Base man sa mga report nga gusto gid sigon nanda nga pahalinon it mga Duterte ro pangueo base sa andang mga aksyon agud ro bise presidente ro gabaylo.
Halata man sigon nga bias ro mga Duterte sa China ngani nga mahipos sanda sa mga nagakatabo nga harassment sa West Phillipine Sea.
Panindugan man ni Castro nga dapat uwa eun man ro Office of the Vice President bangud nga uwa man raya it bahin sa pagpangtiktik ukon intelligence gathering.
Pahayag nana nga bangud sa nagataas ro utang it nasyon nagakadapat nga ibutang ro kwarta sa mga importante nga butang.
Panan-awan man nana nga ro confidential fund hay paagi eamang sa pangurakot bangud nga raya hay malisod nga i-audit.
