KALIBO, Aklan—-Ginpaiway ag uman nga pagatalakayon it House Committee on Appropriations ro proposed budget it Office of the Vice President ukon OVP sa maabot nga Setyembre 10.
Raya hay kasunod it ginpakita nga bukon it manami nga pamatasan ni Vice President Sara Duterte sa ginpatigayon nga budget hearing it nasambit nga komitiba.
Suno kay House Deputy Minority Leader ag ACT Teachers Rep. France Castro, makasueobo ag dismayado sanda sa gin-ugali it bise presidente bangud sa paghipos kara ag uwa pagsabat sa mga kutana it plenaryo angot sa anang ginaduso nga pondo para sa anang taeatapan.
Base sa proposed budget it P2.03 bilyon pesos, igataeana sigon raya it bise presidente sa mga ayuda, proyekto ag iba pang programa nga insigida man nga ginharangan it minority leader bangud nga may nakataeana nga mga ahensya para dikara.
Bukon suno kana it trabaho it OVP ro magpanupod it ayuda kaparehas it sa medical bills.
Samtang sa pihak nga parte, ginbatikos ni Castro si Duterte sa tambak nga problema nga gin-aywanan kara sa Department of Education nga pagasae-pon it nagbueos kana nga si dating senador ag makaron hay Education Secretary Sonny Angara.
Ginpahayag ni Castro ro anang hugot nga pagpuna sa pagpamati it House Committee on Appropriations sa proposisyong P793.18-billion budget it DepEd ag mga attached agency para sa 2025.
Madumduman nga ro Bise Presidente hay nagresign bilang sekretarya it DepEd ko Hulyo 19, 2024.
