POLICE Report — Patay ro 36-anyos nga eaeaki matapos nga tadtaron it eabu it 73-anyos nana nga ama matapos nga mag-amok sa atubang it andang baeay sa Cebu City ko Sabado.
Nakilaea ro namatay nga biktima nga si alyas Horace samtang arestado ro anang ama nga si alyas Norberto, parehong residente sa Brgy. Babag 2 sa nasambit nga probinsiya.
Sa inisyal nga imbestigasyon it kapulisan, bago ro insidente hay gin-akigan it ama si Horace bangud sa padayun nga paggamit kara it ilegal nga droga.
Nagpanaw it baeay ro biktima ag nakipag-inuman sa anang mga amigo ag kat nag-uli hay nagwala raya sa guwa it baeay ag nagsinggitan nga pagapatyon ro ama kon indi imaw pagabuksan it pwertahan.
Bangud kara, nagbangon halin sa anang eugban si Norberto, nagbo-oe it sanduko ag pagbukas it pwertahan hay insigidang gin-eabu ro anang unga nga tinamaan sa ueo ag iba pang parte it eawas.
Gindaea sa ospital ro biktima apang gindeklara raya nga dead on arrival it doktor.
Nasayuran nga pirmeng naga-amok ro biktima kon una sa impluwensiya it droga ag aeak.
Ginpahaum eon ro kasong parricide kontra sa suspek.
