KALIBO, Aklan — Ginpadumdum it Commission on Elections (Comelec) ro publiko ag mga kandidato nga bawae eon nga magpangampanya , magbakae ag magbaligya it aeak umpisa hin-aga nga adlaw it Domingo, sang adlaw antes ro nakataeanang eleksyon sa Lunes.
Sa interview it Bombo Radyo, ginpahayag ni Provincial Election Supervisor Atty. Elizabeth doronilla nga kaibahan sa daywang adlaw nga liquor ban ro pagbaligya, pagbakae, pag-serve ag pagtanyag it makahieilong nga ilimnon.
Apang suno kana nga sa bilog nga Aklan, pilang hotel ag establisimento sa isla it Boracay ro nag-apply it exemption para sa liquor ban nga ginsertipikahan it Department of Tourism bilang tourist oriented ag naga-“cater” it mga dumueuong nga turista.
Ro liquor ban sigon hay nakabaehag sa Omnibus Election Code.
Kadungan kara, hugut nga gin-abisuhan ni Atty. Doronilla ro mga kandidato nga punduhon ro pagpangampanya umpisa hindunang tungang gabi-i it Sabado.
Samtang , hugut sigon nga magabantay ro pulisya sa sin-o man nga maga-eabag bangud nga may nagakaigo raya nga penalidad.
