Gina-usisa eon it Armed Forces of the Philippines (AFP) ro report it Ukrainian military intelligence nga sangka Pilipino ro gina-alegar nga namatay samtang nakikipagsukoe para sa puwersa it Russia sa Ukraine.
Suno kay AFP spokesperson Col. Francel Margareth Padilla, owa pa it kumpirmasyon ro militar sa nasambit nga balita ag padayun raya nga gina-beripika.
Ginkilaea it Ukrainian intelligence ro gina-alegar nga Pilipino bilang Jeric Jumadil Undol, nga ginasugid nga halin sa Metro Manila.
Base sa report, nakabo-oe sigon si Undol it Russian visa ko Enero ag nagpirma it sang dag-on nga kontrata sa Russian army ko Mayo bago ginpadaea sa frontline.
Suno pa sa Ukrainian intelligence, namatay imaw sa sangka opensiba sa Donetsk region ko ulihing parte it Mayo.
Ginpahayag dugang nga daywa eon nga Pilipino ro namatay samtang sambilog ro bihag, apang padayun pa ro pag-imbestigar kara.
Padayun man nga nagpaandam ro gobyerno kontra sa pagpasakop it mga Pilipino sa dumueuong nga armadong puwersa.
