Kalibo Aklan ———-Gin-anunsyo it Aklan Electric Cooperative (Akelco) nga nakaplastar eon ro andang mga pagpahaum para sa nagahilapit nga eleksyon sa Mayo 9.
Suno kay Engr. Jude Ropa it Engineering Department it Akelco nga kumpiyansa sanda nga bastante ro supply it kuryente pag-abot it eleksyon ag indi makaangkon it brownout.
Sa makaron suno kana hay haeos 95 porsiyento eon nga tapos ro andang clearing operations kamana man nga nakaangkon it pueong kaibahan ro National Grid Corporation of the Philippines ukon NGCP , national electrification administration ukon NEA ag department of energy agud nga makasigurado it round the clock nga operasyon hasta sa proklamasyon it mga bag-ong ilihir nga opisyal .
Mag-eowas kara, nakipag angot man sanda sa sangka independent power producer nga nahamtang sa barangay mabilo engkaso nga indi malikawan nga makaangkon it total brownout agud nga maskin ro banwa it Kalibo hay masuplayan it kuryente .
Dugang pa ni Engr. Ropa nga sa adlaw mismo it eleksyon hay magabutang sanda it mga tawuhan ukon stand-by maintenance kada banwa.
Angot kara, nagapadayun ro andang pag responde sa mga ginapaabot kanda nga request it mga eskwelahan nga ginagamit nga polling centers nga nakakaexperiensiya it low voltage.
Samtang, nagpatigayon man sigon sanda it inspeksyon sa mga polling centers, canvassing centers ag iba pang importanteng election sites.
