Ginkumpirma it Department of Foreign Affairs (DFA) ro pagkamatay it sangka Pilipina sa Israel matapos raya nga tamaan it missile attack sa syudad it Haifa, Israel ko adlaw it dominggo, Abril 5.
Nagpahayag it kasubo ag simpatya ro DFA sa pamilya it namatay ag nagabuylog sa andang kalisod sa tunga it trahedya.
Samtang, kaibahan sa mga namatay ro Israeli national nga asawa it biktima, pati eon ro anang mga biyenan.
Suno sa ahensya, insigidang nakipag-angot ro Philippine Embassy sa Tel Aviv sa mga himata it biktima sa Pilipinas agud ipasayod ro natabo ag siguraduhon ro pagtao it andang kinahang-eanong bulig.
Kaibahan kara ro pag-asikaso sa repatriation it bangkay it namatay sa pihak it nagairal nga tensyon sa rehiyon.
Ginpasiguro mat-a it DFA nga padayon raya nga magatao it suporta sa pamilya, kaibahan ro pinansyal ag iba pang klase it assistance, samtang nagapanawagan it pangamuyo para sa kalinungan ag kaeowasan it mga Pilipinong idto sa Israel.
