KALIBO, Aklan–Mag-eowas nga nagabaligya hay nagatau man it libreng training ro Aklan Agri-Aqua Demonstration Farm and Training Center sa Brgy. Nalook Kalibo.
Suno kay Rotchie Dandoy, sangka farm technician nga kada lunes ro andang schedule it pag-harvest it lettuce ag iba pang tanum kapareho it bell pepper ag kamatis.
Sa mga gustong magbakae ukon walk-in customers, kinahangean suno kana nga mag-temprano bangud nga priority nanda ro mga nagpa-reserve.
Kaeabanan suno kana sa mga nagabakae kanda hay ro mga restaurant owners sa banwa it kalibo ag isla it boracay.
Naga-abot it 40 hasta 60 kilos ro andang gina-harvest nga lettuce ag engkaso nga indi maubos hay ginadaea nanda ro nabilin sa taeatapan it provincial agriculturists sa capitol site agud nga idtu ibaligya.
Ro kada kilo hay nagbalor it kapin sa 200 pesos.
Sa pihak nga parte, gin engganyo man ni Dandoy ro mga gustong maka-intigo it farming eabi eon ro pagtanum it lettuce nga mag-agto eang sa andang farm agud nga matur-an it pilang technique sa pagpatubo ag pagpa-abu it nasambit nga tinuea.
Samtang, may ginatukod man makaron nga bag-ong greenhouse sa lugar nga plano nga pagabutangan it mga cut-flowers partikular it chrysanthemums.
