KALIBO, Aklan — Nagpahayag it suporta si Sangguniang Panlalawigan member Nemesio Neron sa uman nga pagbalik it death penalty sa nasyon kapareho it nasambit ni Pangueong Rodrigo Duterte sa anang ika-4 nga State of the Nation Address ukon SONA .
Suno kay Neron nga dapat hay kato pang paniempo ginbuhi ro proposisyon nga bitay partikular sa mga naeakot sa makangieidlis nga krimen nga kaeabanan nga tuga it pagka-adik sa iligal nga droga.
Ginpahayag dugang nga mataw-an kara it ngipon ro krusada it gobyerno kontra sa krimen, droga, corruption ag iba pa.
Madumduman nga sa pagbukas it 18th Congress ko Lunes, ginhinyu ni Pangueong Duterte sa mga mamalidha nga maibalik ro penalidad nga kamatayon sa mga kasong may kaangtanan sa illegal nga droga ag plunder nga ginsuspinde ko 2006.
Samtang, nagapati si Neron nga owa man it problema sa justice system it nasyon bangud nga maabu eon man nga mga naeakot sa heinous crimes nga nasentensiyahan it hasta nagakabuhi nga pagka-presu.
