KALIBO, Aklan—Kaibahan si Aklan Governor Jose Enrique “Joen” Miraflores sa mga gobernador nga gin-imbitahan nga maging saksi sa pagpirma it Constructing Our Future: Memorandum of Agreement ukon MOA sa tunga it Department of Education ag mga probinsiya para sa Nationwide Classroom Building Program, nga ginpatigayon ko adlaw it Miyerkules, Pebrero 11, 2026 sa Heroes Hall sa Palasyo it Malakanyang.
Ginpangunahan nanday Pangueong Ferdinand Marcos, Jr., ag DepEd Secretary Sonny Angara ro pagpirma sa kasugtanan nga mas pa nga magapabakod sa partnership it DepEd ag mga Local Government Units agud nga mapadasig ro pagpatindog it mga classroom sa bilog nga nasyon ag masabat ro kakueangan sa mga learning facilities.
Ginpaathag ni Governor Miraflores nga sa idaeum it nasambit nga programa, pagatumuron it DepEd ro mga prayoridad nga eskwelahan, magataeana it mga teknikal nga sueundanan, magatau it mga disenyo it classroom ag magataeana it pondo.
Pagapangunahan sigon it mga LGU ro procurement, konstruksyon, rehabilitasyon, ag pagpamayad it mga classroom sandig sa national standard.
Dugang pa it gobernador nga ro anang pagpasakop sa nasambit nga MOA signing hay nagapasiguro nga ro probinsiya it Aklan hay nagapabilin nga nakasuporta sa mga national education initiative.
Ro MOA hay suportado it 2026 General Appropriations Act nga nagtaeana it masobra sa P85.39 bilyon para sa Basic Education Facilities.
Nasayuran nga kapin sa 4,000 nga bag-ong classroom ro igapatindog agud nga masabat ro classroom shortage sa nasyon.
