KALIBO, Aklan—Ginpabugae ni Aklan governor Joen Miraflores nga amat-amat eon nga nataw-an it katumanan sa anang unang 100 days sa pwesto ro anang mga ginpromisa kato sa anang inaugural address.
Raya hay may kaangtanan sa anang mga ginataw-an it prayoridad nga sektor partikular sa health services, agrikultura, tourism and economy, youth and education, kamana man ro social services and governance.
Ginbida pa kara nga nagmadinaeag-on eon ro health sector sa pagsukoe sa covid 19 pandemic, apang ginatinguhaan nga mapasaka pa ro numero it mga nabakunahan partikular ro booster shot.
Mag-eowas sa covid 19, ginatutukan man makaron ro dengue ag iba pang sakit nga daea it namok kapareho it malaria.
Bangud sa gulping pagsaka it numero it namatay tuga it rabies, mas pang ginpabaskog ro vaccination sa mga alagang kuring ag ayam nga kaeabanan nga carrier it nasambit nga virus.
Sa pihak nga parte, bangud nga ro aklan hay sambilog sa mga pilot site it universal health care coverage law, ginatinguhaan makaron it provincial ag district hospitals nga ma-implementar ro mga proyekto ag programa agud nga makaangkon it access ro tanan nga mga aklanon sa mga kinahangean sa andang pagpabueong.
