KALIBO, Aklan—Uman nga ginpaeawig it Inter-Agency Task Force for the Management of Emerging Infectious Diseases (IATF-EID) ro pagpaidaeum sa probinsiya it Aklan sa Modified Enhanced Community Quarantine ukon MECQ status hasta sa Setyembre 7, 2021.
Raya hay sa pihak it pagnaba it kaso it COVID-19.
Matapos nga ginbutang ro aklan sa MECQ umpisa ko Agosto 1, 2021, hugut nga ginpatuman ro mas mahabang 8 p.m. hasta 5 a.m. nga curfew ag ro liquor ban sa bilog nga probinsiya.
Ro operasyon it mga establishments hay umpisa alas-6 it agahon hasta alas 5 it hapon ag ro biyahe it mga pampublikong transportasyon hay alas-5 it agahon hasta alas 6 it gabi-i.
Bawae man ro mass gathering ukon pagtipon-tipon it masobra sa limang katawo.
30 % eamang it venue capacity ro ginapasugtan sa religious gatherings samtang ro lamay sa mga patay hay ginalimitahan eamang sa mga miyembro it pamilya.
Ro mga persona nga magasueod sa probinsiya hay kinahangean nga magpa-rehistro sa QR Code System.
Ginapasugtan man ro pag-agto it mga tawo sa vaccination sites basta nga makapakita sanda it pruweba it andang vaccination schedule.
Angot kara, ginkalipay ni P/Col. Ramir Perlas, Provincial Director it Aklan Police Provincial Office ukon APPO ro ginpakita nga kooperasyon it publiko sa mga ginapatuman nga restrictions sa idaeum it MECQ.
Apang sa adjustment period suno kana hay maabu ro andang na-tiketan matapos nga mag-eabag sa health and safety protocol partikuar sa social distancing, curfew , owa pagsuksok it facemask ag faceshield ag iba pa.
Gindayaw man ni Col. Perlas ro mga banwa nga nagpatuman it ‘no movement Sunday’ nga naging epektibo suno kana sa pagtapna it transmission it virus.
Nasayuran nga ro mga APOR eamang ro ginapasugtan nga makasueod-guwa sa mga border control checkpoints samtang ro mga non-essential hay limitado sa 15 kada banwa.
