Padayun nga igapatuman it Aklan ro guidelines it National Inter-agency Task Force for the Management of Emerging Infectious Diseases para sa Modified General Community Quarantine (MGCQ) maskin nga ginpaidaeum eon ro probinsiya sa low risk area .
Suno kay League of the Municipalities of the Philippines (LMP-Aklan) Chapter President ag Ibajay Mayor Jo-en Miraflores nga samtang owa pa it bag-ong sueundanan it IATF hay padayun nanda nga pagasundon ro ginpaguwa nga Executive Order ni Governor Florencio Miraflores.
Sa pinaka-ulihing Executive Order ni Governor Miraflores, ginpahayag kara nga hugut sa gihapon nga ginapatuman ro sueundanan agud nga malikawan ro pagkalhit it coronavirus disease (COVID-19) kamana man nga maprotektahan ro ikamayad nga eawas ag kaeowasan it publiko.
Gindugang pa it alkalde nga bukon eamamg sanda ro nag-apela sa IATF kundi nga maabu nga iba pang lokal nga gobyerno pasugtan eon ro angkas sa motorsiklo basta nga ro nakasakay hay mag-asawa ukon magpamilya.
Kamana ro pagbo-oe sa age limit sa mga pwedeng makaguwa eabi eon sa mga senior citizens ag naga-edad 21 panaba.
Owa pa suno kana it desisyon angot kara ro IATF .
Sa pihak nga parte, pabor si Mayor Jo-en nga paeawigon pa ro implementasyon it curfew bangud nga mabahoe sigon ro naging kontribusyon kara sa pagsukoe kontra sa COVID-19.
Nagpanawagan man imaw sa mga business establishments nga hugut sa gihapon ro minimum health and safety standards, kapareho it “no face mask, no entry” policy, pagbutang it mga hand sanitation stations, ag pagsunod sa social ag physical distancing rules.
Samtang , gindayaw man nana ro mga Barangay Health Emergency Response Team (BHERTs) bangud sa hugut nga pagbantay sa andang natungdan nga mga lugar eabi eon ro pagmonitor sa mga nag-uli nga locally stranded individuals .
