KALIBO, Aklan—Aminado ro Office of the Provincial Veterinarian ukon OPVET nga medyu malabo pa nga maabot it Aklan ro “dark green zone” ukon free zone sa African Swine Fever ukon ASF zoning status.
Apang suno kay kay Dr. Ivy Lachica, Livestock Inspector 1 it OPVET Aklan nga ginaproseso eon ro pag-lift ukon pag-upgrade it mga banwa sa yellow zone halin sa pink zone.
Sa makaron hay una sa proseso it sentineling ro pilang banwa it Aklan samtang ro iba hay nagahueat it approval.
Raya hay ginaeakipan it Banga, Balete, Madalag, New Washington, Malinao ag Nabas.
Ro proseso it sentineling suno kana hay bukon eamang it angot sa pagpanupod it urok kundi kaibahan man ro partisipasyon it natungdan nga LGU nga magpaguwa it sangka executive order nga nagatumod sa mga tikang nga ginahimo kontra sa ASF, kahauman it mga mangunguma sa biosecurity level, ag pagpaidaeum sa training para sa dugang nga kasayuran.
Pagkatapos nga ipanupod ro mga urok sa pilang mga benepisyaryo hay gina-monitor raya sa sueod it 40 diyas.
Engkaso nga mabuhi ro urok hay nagakahueugan nga owa it presensya it virus ag pwede eon nga magsaylo sa yellow category nga sangka senyales para sa pag-umpisa it pag-alaga ag uman nga pagpa-abu it baboy.
Samtang, ginpahayag pa ni Dr. Lachica nga mahae ro presyo it karne it baboy makaron bangud nga ro kaabuan nga supply hay nagahalin sa ibang probinsiya nga una eon sa pink zone.
Nagahampang ro presyo makaron it buhi nga baboy sa P260 hasta P280 per kilo samtang ro karne it baboy hay P380 hasta P390.
