KALIBO, Aklan—Uman nga ginpasiguro ni Aklan first district board member Soviet Russia Dela Cruz nga supisyente ro supply it pagkaon sa probinsya it Aklan.
Raya hay base sa andang pakikipaghinun-anon sa National Food Authority (NFA) ag sa iba pang natungdan nga ahensya it gobyerno nga sanda ro nagasiguro nga maging bastante ro supply it mga nagapangunang kinahang-ean it mga pumueoyo samtang una sa idaeom it enhanced community quarantine ro bilog nga probinsya tuga it nagapadayon nga paeag it 2019 coronavirus disease ukon COVID-19 pandemic.
Suno kana, bastante ro stock makaron nga paeay ag bugas it NFA sa anda nga mga pribadong bodega.
Ro ginatinguhaan sigon makaron it Office of the Provincial Agriculture nga maipanupod ro seedlings it mga tinuean-on nga madaling magtubo ag magbahoe sa mga mangunguma agud nga makabulig sa supply it tinuean-on engkasong mag-eawig pa ro enhanced community quarantine.
Nasayuran nga gin-aprubahan eon it Inter-Agency Task Force for the Management of Emerging Infectious Diseases (IATF-EID) ro mga rekomendasyon it Department of Agriculture (DA) nga pasugtan ro mga pagpanguma ag pagpangisda kamana man taw-an it exemption ro mga mangunguma, mangingisda, farm workers ag agri-business personnel sa lockdown ukon travel ban para maka-uma ag makapangisda agud nga masiguro ro bastante nga supply it pagkaon.
Samtang sa pihak nga parte, ginlaygayan ni Dela Cruz ro tanan nga sundon ro ginapatuman nga sueondanan it gobyerno agud nga inde maeatnan it sakit nga COVID-19.
