KALIBO, AKLAN — Pilang oras pa eamang matapos nga makabalik sa pwesto kahapon, insigida nga ginserbihan it dismissal order it Department of Interior and Local Government (DILG) si Malay Mayor Ceciron Cawaling bilang alkalde it banwa it Malay.
Guilty si Mayor Cawaling sa kasong Grave Misconduct, Gross neglect of duty, conduct unbecoming of a public official ag conduct prejudicial to the best interest of the service.
Angot kara, balik sa pagiging alkalde si Vice Mayor Abram Sualog.
Kaibahan sa nasentensiyahan ag napahalin sa serbisyo si Malay Licensing Officer Jen F. Salsona.
Si Cawaling ag Salsona hay indi eon pwedeng makaserbisyon sa gobyerno ag indi eon makabaton it anumang benepisyo.
Nasayuran nga ko Oktubre 25, 2018, sang adlaw antes ro uman nga pagbukas it Boracay hay ginpapanaugan it Office of the Ombudsman it preventive suspension si Mayor Cawaling.
Nag-ugat raya sa mga reklamong ginpasaka kana angot sa gina-alegar nga pagpabaya nga naging rason it environmental problems sa Boracay.
Hunyo ko nagtaliwan nga dag-on kat magpasaka ro DILG it mga reklamong kriminal ag administratibo kontra sa 17 opisyal it probinsiya it Aklan.
Samtang, sa ginpaguwa nga mandu it DILG, gin-abswelto kara sanday Aklan Governor Florencio Miraflores; dating Provincial Environment and Natural Resources Officer (PENRO) nga si Valentin Talabero; Malay Vice-Mayor Abram Sualog, mga miyembro it Sangguniang Bayan it Malay ag mga Punong Barangay sa isla it Boracay bangud sa ginasugid nga bukon it bastante nga ebidensya nga ginplastar it husgado.
