KALIBO, Aklan—Ginkumpirma ni Provincial Health Officer 1 Dr. Cornelio Cuatchon Jr. it PHO Aklan nga Covid-19 free ro bilog nga probinsya.
Raya hay matapos nga uwa it ginamonitor ro ahensya nga Covid-19 suspected, probable ag confirmed case nga admitted sa hospital.
Ginpaathag nga nagapabilin sa napueo ro kaso it makataeapon nga sakit sa Aklan hasta sa makaron nga panyempo.
Sa nasambitang numero, an-om ro may travel history sa Metro Manila ag ro ap-at hay mga repatriated overseas Filipino workers ukon OFW’s nga tanan hay nakarekober eon halin sa nasambit nga sakit.
Base sa pagtuon, 81 porsyento ro nagaangkon it mild symptoms nga ginakaeakipan it ubo, eagnat ag sipon.
Samtang, 14 porsyento ro nagapadayon sa severe nga kon sa siin nabubudlayan eon magginhawa ag 5 percent eamang ro makabig nga una sa kritikal nga kondisyon nga kinahang-ean eon nga isueod sa intensive care unit kamana man nagakinahang-ean it mechanical ventilator para makaeowas sa makamataeay nga sakit.
Ro mga nagpositibo sa sakit sa Aklan hay mild to moderate eamang ro andang kondisyon rason nga madasig ro mga raya nga magmayad.
Ginpahayag dugang ni Dr. Cuatchon nga base sigon sa mga eksperto, ro mga Covid-19 positive nga ginpaidaeom sa 14 days quarantine hay posible nga inde eon makatapon sa ibang tawo pag-abot sa pang-onse diyas nanda nga uwa eon it nabatyagan nga sintomas.
Kaangot kara, ginarekomenda nga inde eon pag-irepeat testing ro mga nag-negatibo sa RT-PCR test kamana man inde eon kinahang-ean it mga raya nga magpaidaeom pa it uman sa 14 days home quarantine procedure.
