Kalibo Aklan —— Ginkumpirma it Provincial Health Office ukon PHO-Aklan nga nagapabilin nga coronavirus disease ukon COVID-19 free ro bilog nga probinsiya it Aklan .
Suno kay Dr. Cornelio Cuatchon it PHO-Aklan nga as of March 17, nakalista it 6 nga Persons Under Investigation (PUI0 it makataeapon ag makamaeatay nga coronavirus , kun sa siin, 3 kara hay naka-admit sa Provincial Hospital ag ro 6 hay naka-home quarantine .
Ginpahayag dugang nga humampak eon sa 2,347 ro persons under monitoring ukon PUM, kun sa siin pila sa mga raya hay mga doctor nga na-expose sa mga PUIs ag PUMs .
Ro mga PUM suno kana hay ro mga indibidwal nga owa it sintomas it sakit, apang may history of travel sa mga nasyon ukon lugar sa Pilipinas nga infected it virus .
Kinahangean sigon nanda nga magsunod sa 14 day quarantine bangud nga kon indi hay sarang sanda nga maaresto it kapulisan sandig sa ginpatuman nga state of public health emergency sa ginpirmahan nga Proclamation 922 ni Pangueong Duterte ag sa RA 9271 ukon mas kilaea sa tawag nga Quarantine Act of 2004 kamana sa RA 11332 ukon Mandatory Reporting of Notifiable Diseases and Health Events of Public Health Concern Act”.
Raya sigon hay may penalidad nga naga-abot sa sang buean hasta 6 nga buean nga pagkakulong nga may multang naga-abot sa 20,000 hasta 50,000 pesos.
Matapos sigon ro 14 diyas nga home quarantine hay paga-isyuhan ro mga raya it medical clearance nga nagapamatuod nga owa sanda it sakit rason nga kinahangean nga seryosohon gid.
Ro Barangay Health Emergency Response Team ro nakatuka nga magabantay sa mga PUM sa koordinasyon it LGU ag municipal health office.
Uman man imaw nga nag-apela sa publiko nga likawan nga magpakalhit it fake news .
Pirmang maghugas it alima ag i-practice ro social distancing .
