KALIBO, Aklan—Ginkumpirma it Aklan Provincial Health Office nga nakalista eon ro probinsya it tatlong kumpirmadong kaso it 2019 coronavirus disease ukon COVID-19 pandemic.
Suno kay Provincial Health Officer II Dr. Cornelio Cuatchon it PHO-Aklan, ro unang kaso hay sangka 81-anyos nga eaeaki halin sa banwa it Libacao nga may travel history sa Metro Manila ko March 10 kon sa siin nakaangkon raya it sintomas nga eagnat ag ubo.
Ginpakonsulta sigon it anang pamilya ro senior citizen ag ginpaidaeom sa strict home quarantine hasta nga makaron nga adlaw it Biyernes, March 27 nag-abot ro confirmatory result it anang specimen sample halin sa Research Institure for Tropical Medicne (RITM) nga nag-positibo raya sa sakit.
Ro pangaywang kaso suno kay Dr. Cuatchon hay ro sangka 37-anyos nga eaeaki halin sa banwa it Malay.
Ro pasyente hay presenteng naka-admit sa provincial ospital ag may travel history sa Metro Manila ko March 4 hasta it March 7, 2020 ag sambilog sa mga ginakabig nga person under investigation ukon PUI bangud sa pag-angkon nana it sintomas nga ubo, sipon ag sore throat kon sa siin gilayon raya nga ginboe-an it specimen sample ag ginpadaea sa RITM.
Makataliwan ro pilang adlaw halin kat ginpaeksamin ro anang specimen sample hay nagguwa ro confirmatory result kon sa siin nagpositibo man raya sa sakit.
Samtang, ro pangatlong kaso hay sangka 68-anyos nga eaeaki nga may travel history man sa Metro Manila ko March 6 ag nakaangkon raya it sintomas ko March 14 kaparehas it ubo ag sipon.
Ro pasyente hay presenteng una sa Aklan training center ag una eon sa stable condition.
Sa makaron suno kay Dr. Cuatchon hay ginmanduan eon nanda ro lokal nga gobyerno it nasambit nga mga pasyente agud nga mausoy ro mga nakahalubilo it mga raya.
Samtang, ginaistudyuhan pa makaron it gobyerno probinsyal ro rekomendasyon it PHO nga ipaidaeom sa total lockdown ro bilog nga probinsya it Aklan agud nga inde eon magkalhit pa ro sakit.
