Kalibo Aklan —— Nakalista eon makaron ro probinsya it Aklan it ap-at nga kaso nga nagpositibo sa 2019 coronavirus disease (COVID-19).
Base sa datos nga ginpaguwa it Department of Health (DOH) Region VI, ro pang ap-at nga kaso sa Aklan hay ro sangka 44-anyos nga eaeaki.
Raya hay may travel history ag posible nga na-expose sa anang mga nakahalubilo apang presenteng una sa stable condition.
Nasayuran nga ro tatlong nauna nga kaso hay ro sangka 81-anyos nga eaeaki halin sa banwa it Libacao nga presenteng una sa isolation ward it Aklan Provincial hospital, ro pangaywa hay ro sangka 37-anyos nga eaeaki halin sa banwa it Malay nga naka-quarantine makaron sa Aklan training center ag ro pangatlo hay ro 68-anyos nga lay minister it St. Jhon the Baptist Cathedral nga taga banwa it Kalibo ag presenteng una man makaron sa nasambitang hospital.
Ro tatlo hay una sa stable condition samtang ro andang mga nakasalamuha partikular ro andang mga pamilya hay nagpaidaeom eon man sa 14 days quarantine period.
Sa makaron hay 22 eon ro nailistang kaso it COVID-19 sa bilog nga Western Visayas.
