KALIBO, Aklan—Gin klaru it pamunuan it Aklan Police Provincial Office ukon APPO nga owa pa sanda it ginakabig nga suspek kundi nga person of interest pa eamang sa makangieidlis nga pagpatay sa 23 anyos nga turistang Slovak sa isla it Boracay.
Sa interview it Bombo Radyo, ginpahayag ni P/Lt. Aubrey Ayon, nagatindog nga spokesperson it ginbilog nga Special Investigation Task Group ukon SITG nga haeos 80 porsiyento eon ro andang ginapatigayon nga imbestigasyon sa nasambit nga kaso.
Padayun pa sigon ro andang pagtipon it mga impormasyon ag ebidensiya, apang nagpamalibad anay nga magtau it dugang nga detalye agud nga maprotektahan ro daeagan it imbestigasyon.
Gina-imbestigahan man sigon makaron ro pag-execute it extrajudicial confession it sambilog sa mga person of interest sa Office of the Provincial Prosecutor .
Ginpamalibaran man nana ro unang napabalita nga may foreigner nga eakot sa krimen .
Sa makaron hay nakatututok ro ginbilog nga SITG sa kaso agud nga mataw-an it hustisya ro ginpatay nga turista ag ro anang pamilya.
Sa pihak nga parte, padayun man nanda nga ginahueat ro resulta it autopsy report agud nga matumod ro pinakarason it anang pagkamatay.
Samtang, nagpaguwa it P100,000 nga padya ro taeatapan ni Aklan 2nd district congressman Ted Haresco para sa makatau it impormasyon sa madasig nga pagresolba sa kaso.
Madumduman nga ko nagtaliwan nga domingo hay nakita eon lang ro bangkay it turista sa sangka abandonadong kapilya nga owa it eambong nga pang-ubos ag una eon sa state of decomposition.
Sa pihak nga parte, bangud sa nagahilapit nga summer vacation, ginpasiguro kara nga nagapabilin nga eowas nga agtunan it mga turista ro Boracay ag kabilugan nga banwa it Malay.
