KALIBO, Aklan—Ginpatigayon it Aklan Police Provincial Office (APPO) sa pagpanguna ni Provincial Director P/Col. Arnel Enrico Ramos ro sangka pre-deployment briefing para sa mga PNP personnel nga iga-deploy para sa maabot nga eleksyon sa Mayo 12, 2025.
Sa nasambit nga aktibidad, gintaw-an nana it importansiya ro pagpatuman it hugut nga seguridad, pagiging alerto it mga pulis sa posibleng mga paeag ag aktibong partisipasyon agud nga masiguro ro matawhay ag maayos nga eleksyon.
Raya hay kaparte it maid-id nga koordinasyon sa tunga it COMELEC, PNP, ag iba pang natungdan nga ahensiya para sa eowas ag tampad nga eleksyon.
Ro mga pulis nga iga-deploy hay halin sa Aklan PPO, kamana man sa First ag Second Mobile Force Company.
Igapadaea sanda sa nagkaeain-eain nga municipal police stations nga nagakinahangean it augmentation.
Nakaangkon man it blessing of troops sa pagpanguna ni Fr. Vincent Cahilig, spiritual adviser it Aklan PPO.
Ginpasiguro man nga activated eon umpisa pa ko Enero ro gintukod nga Provincial Election Monitoring Action Center (PEMAC).
Ro PEMAC hay maga-function bilang andang central command post para sa monitoring, consolidating, ag coordinating it tanan nga mga election-related activities sa bilog nga probinsiya.
Kapin sa 1,000 nga mga pulis ro igapakalhit sa bilog nga Aklan agud nga magbantay sa mga voting centers, border control checkpoint, quick reaction team ag iba pang mga lugar.
Ginkumpirma dugang nga kapin sa 30 nga security force ro iga-augment sa Aklan halin sa Regional Mobile Force Company.
Samtang, posibleng hin-aga nga adlaw it Miyerkules, Mayo 7 hay paga-umpisahan eon ro pagdaea it mga automated counting machines sa mga eskwelahan nga pagagamiton nga polling precincts ag iba pang election paraphernalias.
Sa pihak nga parte, ginpadumdum dugang ni P/Col Ramos ro mga kapulisan nga magpabilin nga apolitical makaron nga nagahilapit ro eleksyon ag ipatuman ro andang obligasyon ag ro peace and order.
Responsibilidad sigon it PNP nga protektahan ro eleksyon ag indi makisawsaw sa mga politiko.
