Kalibo Aklan ——-Desidido nga magbakae it bakuna kontra COVID-19 ro Provincial Government sa probinsya it Aklan.
Suno kay Aklan Governor Florencio “ Joeben” Miraflores nga sa makarun hay ginabaeay eun ro magiging preparasyon it vaccine roll out sa probinsya.
Kung maging available eun ro bakuna sa merkado hay preparado eun ro provincial government nga magbakae kara.
Apang una nga pagataw-an it prayoridad sa bakuna ro mga health care workers, frontliners, mga ginakabig nga vulnerable ukon madali matapnan it makamaeatay nga sakit nga coronavirus disease ukon COVID-19 kapareho it mga senior citizens ag ro may mga dati eun nga ginabatyag nga sakit.
Ginapahayag dugang nga kabulig it gobyerno probinsyal ro BFF foundation para sa pagpreparar it magiging roll out engkasong may una eun nga bakuna.
Pag-abot man sa budget hay may inistial negotation eun sanda sa sangka government financial institution.
Ginpasiguro man kara nga indi eamang magsalig ro probinsya sa national government agud mas mapadali ro pagbakae it bakuna.
Samtang, igakonsidera man sigon kara ro efficacy ag ro presyo it bueong nga pagabak-eon.
Samtang, gin-engganyo man Aklan Governor Florencio Miraflores ro publiko nga padayun nga magsunod sa ginpatuman nga health protocol mas kapin pa ag may una euman nga naga-eapta nga bag-ong strain it COVID-19.
Ginasugid nga mas makataeapon pa raya nga unang nailista sa United Kingdom.
