Kalibo Aklan —–Nagapadayon ro 24/7 nga pagbantay it mga otoridad sa mga Provincial road agud nga masikyar ro tanan nga nagaguwa ag nagasueod sa banwa it Kalibo.
Suno kay Elberto Ureta Jr., head it medical team sa checkpoint nga nakataeana sa Brgy. Caano, Kalibo, maid-id ro pagsikyar it Bureau of Fire, Kalibo PNP ag Municipal Disaster Risk Reduction Management Office (MDRRMO) sa tanan nga mga motorista nga naga-agi sa lugar.
Ginpahayag dugang nga nagapabilin nga kontrolado ro pagguwa-sueod it mga tawo partikular sa banwa it Kalibo bangud nga uwa it makaeosot sa checkpoint kon uwa it quarantine pass ag iba pang mga legalidad nga dokumento nga gina-isyu it gobyerno sa idaeom it mga guidelines nga ginasunod halin kat ginpaidaeom sa enhanced community quarantine ro bilog nga probinsya it Aklan.
Samtang, uman nga ginlaygayan ni Ureta ro publiko nga kon uwa it importante nga panaw sa banwa hay inde eon lang ro mga raya maghalin sa tagsa nanda ka panimaeay.
Himuon ro physical distancing ag ipabilin nga malimpyo ro eawas agud nga malikawan ro Sars-CoV-2 nga nagadaea it sakit nga 2019 coronavirus disease (COVID-19).
