KALIBO, Aklan—Ginakabig nga makasaysayan sa unang kahigayunan ro 2019 May midterm election sa probinsya it Aklan.
Raya hay kasunod it pag-apruba it Comelec En Banc sa Republic Act 11077 ukon ro pagtunga sa probinsya it Aklan sa daywang distrito nga gin-akda ni Aklan Congressman Carlito Marquez, limang adlaw antes ro filing it candidacy (COC) sa Oktubre 11 hasta it 17, 2018.
Base sa ginpaguwang Resolution No. 10433, nagakahueogan raya nga makaangkon it daywang kongresista sa kongreso ag magadoble eon man sigon ro Priority Development Assistance Fund (PDAF) kada dag-on para sa probinsya.
Nauna eon kara nga ginpirmahan ni Pangueong Rodrigo Duterte ro RA 11077 ag gin-publish sa peryodiko nga magabuhay it 15 diyas.
Kasunod kara ro paghimo it implementing rules and regulations ukon IRR it Commission on Elections sa sueod it 30 diyas.
Apang uwa pa natapos ro 30-diyas hay gilayon eon raya nga gin-aprubahan it Comelec En Banc ag makahingabot sa filing it COC para sa 2019 mid-term election nga maga-umpisa sa oktubre 11 hasta it 17.
Nasayuran nga ro first district it Aklan hay ginakaeakipan ko mga banwa it Kalibo, Altavas, Balete, Batan, Libacao, Madalag, New Washington ag Banga samtang ro second district hay ginabilog it Malay, Buruanga, Ibajay, Nabas, Malinao, Tangalan, Makato, Numancia ag Lezo.
