KALIBO, Aklan–Uman nga nagpasakop ro probinsiya it Aklan sa tatlong adlaw nga Philippine Travel Mart 2022 nga nagbukas ko Sept. 30 ag magatapos sa October 2 sa SMX Convention Center sa Pasay City.
Suno kay Aklan 2nd district Sangguniang Panlalawigan member Jay Tejada nga mag-eowas nga ginbida ro mga nagapangunang tourist destination sa probinsiya eabi eon ro sikat nga isla it boracay hay gin-showcase man ro piña fabric it aklan nga ginakabig nga sambilog sa pinakamanami nga tela bukon eamang sa bilog nga Pilipinas kundi sa bilog nga kalibutan.
Nagrampa suno kana ro mga alkalde ag iba pang mga opisyal it probinsiya kaibahan sanday Governor Joen Miraflores ag Vice Governor Reynaldo Quimpo suksok ro mga dekalibreng barong ag gowns bilang kaparte it cultural show.
Nasayuran nga masobra sa 300 nga mga exhibitors ro nagtililipon sa event nga nagtanyag it hasta sa 50 porsiyento nga discounts sa pamasahe sa eroplano, accomodations kamana man ro local and international travel packages sa mga gustong magbakasyon sa nagkaeain-eain nga tourist spots sa nasyon.
Kumpiyansa ro mga exhibitors nga madugangan ro andang kita makaron nga eubusan eon nga ginhaeugaan ro travel restrictions ag gindugangan ro mga tourism activities makataliwan ro masobra sa daywang dag-on nga instriktong protocol sa pagbiyahe ag lockdown tuga it covid 19 pandemic.
