KALIBO, Aklan — Ginkumpirma it Provincial Health Office (PHO)-Aklan nga zero positive eon ro kaso it coronavirus disease ukon COVID-19 sa probinsya it Aklan.
Suno kay Dr. Cornelio Cuatchon Jr. it PHO-Aklan, negatibo eon sa ginpatigayong real-time reverse transcription polymerase chain reaction (RT-PCR) test ro sangka babayeng repatriated seafarer nga nag-uli sa Aklan ko Abril 29.
Nagmayad eon man sigon ro 68 anyos nga lay minister nga taga-Barangay Andagao, Kalibo, Aklan matapos ro ginhimo nga pangaywang eksaminasyon kana.
Sa pitong kumpirmadong COVID-19 cases sa probinsya, an-om eon ro fully recovered.
Sa pihak nga parte, puro nag-negatibo sa RT-PCR Test ro an-om nga repatriated OFWs nga nag-abot ko adlaw it Miyerkules.
Ginpahayag ni Dr. Cuatchon nga antes ginpauli ro mga raya halin sa Maynila hay bitbit eon nanda ro resulta it andang COVID test.
Pwede eon makauli ro mga raya sa tagsa-tagsa nanda ka pamilya pagkatapos nga indi makitaan it sintomas it sakit sa sueod it daywang dominggong hotel quarantine.
Maskin nga zero case eon ro Aklan, nagpadumdom si Dr. Cuatchon nga una sa idaeom gihapon it general community quarantine ro probinsya.
