MALAYSIA – Inspirasyon ni Ryan Salazar Lopez sangka fashion designer ro anang mga nakikita ag napapan-uhan nga scarecrows rason nga raya ro anang ginhimo nga halimbawa ku anang mga desinyo sa anang collection nga gindaea ag ginsukoe sa nasyon nga Malaysia sa sangka Precious of Malaysia International Cultural Fashion Week 2024.
Habueo ku disenyo ni Lopez ro atensyon ag pumabor kana ro mga hurado rason nga imaw hay nagdaog bilang Best Traditional Design Awardee.
Kaibahan nana ro anang mga mga abyan nga mga fashion designers kun siin ro anang collections hay ginsuksok it mga international models.
Ginpokusan nana ro traditional category ag nagapati imaw nga ro nagpadaog kana hay kun paano nana gindaea ro Aklan sa Malaysia.
Imaw eang man ro naggamit it handmade nga material eain sa anang 18 nga mga kakompitensya.
Pagsaysay nana nga napabilib ag nakibot man ro foreign designers sa anang hinimuan bangud mag-euwas sa pinya hay naggamit man imaw it buri ag abaka.
Sa kamatuoran sa Nobyembre pa ro anang kompetisyon apang tinawagan imaw ag ginpasayod ng Agosto raya hiwaton apisar man nga pilang dominggo ro anang preparasyon hay naging madinaeagon man sigon ro anang nahimo.
Antes makapasakop sa nasambitan nga kompetisyon, ginnomina imaw ku anang amigo nga fashion designer kun siin ginscreening sigon sanda it mabusisi rason nga indi basta eang nga makaintra kara.
Panugid man nana nga may pipila man kana nga nagsuporta halin sa anang pamilya ag mga alkalde.
Tumandok si Lopez it Kalibo samtang ro anang ina hay halin sa Batan, Aklan ag halin unga pa imaw hay nakahiligan eun nana ro mga eambong bangud man sa anang lola.
Katuyuan ni Lopez nga daehon, ipakilaea ag ipromote ro native products it Aklan eabi eun ro pinya fiber sa ibang nasyon.
Laygay nana sa mga aspiring young designers hay magpati eamang sa kaugalingon para mangin madinaeagon.
