KALIBO, Aklan—Sakripisyo sa pag-eskwela it husto apang inde pagkalipatan nga magpahuway eabi eon kon medyo inde eon kaya ro leksyon nga pueawan.
Raya ro sikreto nga ginpakigbahin ni Niel Angelo Fetilo Dela Cruz, tubong banwa it Banga sa interview it Bombo Radyo Kalibo sa anang pagtapos sa kolehiyo nga pagasab-itan imaw it mataas nga latin honor.
Si Dela Cruz hay magatapos bilang Summa Cum Claude sa Asia Pacific College sa kursong Bachelor of Science in Entertainment and Multimedia Computing with specialization in Game Development nga ro andang graduation hay igapatigayon sa adlaw it Martes, Agosto 8, 2023.
Ginpahayag dugang nga bukon man it hangae ro anang inagyan sa pag-eskwela hasta nga nabuoe ro general average nga 3.8 kon sa siin eubus gid ro anang pagpasaeamat sa anang mga ginikanan bangud nga provided tanan ro anang mga kinahang-eanon sa eskwelahan.
Bukon sigon it bastante ro laptop eamang para makahimo it mga video games rason nga uwa it masudlan ro anang kalipay bangud haeos tanan hay ginta-o it anang mga ginikanan para maabot ro kadaeag-an.
Si Dela Cruz hay presente makaron nga nagatrabaho bilang game developer bangud nga insigida imaw nga ginbuoe it kompanya sa tyempo it anang on-the-job training.
